Clwb Pêl-droed Met Caerdydd wedi'i ddyfarnu statws Categori A a statws Academi Merched FAW

Mae Prifysgol Metropolitan Caerdydd wrth ei bodd yn cyhoeddi bod Academi Clwb Pêl-droed Met Caerdydd wedi cael statws Categori A a statws Academi Merched FAW ar gyfer tymor 2025-26.

Mae cael statws Academi Categori A am yr ail flwyddyn yn olynol yn caniatáu i'r academi bêl-droed barhau i ddatblygu a thyfu ei chynnig i rai o bêl-droedwyr ifanc gorau Cymru. Bydd cael statws Academi Merched Cymdeithas Bêl-droed Cymru am y tro cyntaf yn caniatáu i'r clwb pêl-droed hyrwyddo cyfranogiad yn lleol trwy brofiadau a mynediad gwell, gan ddarparu mwy o gyfleoedd proffesiynol a chael gwared ar rwystrau i ddatblygiad.

Dywedodd Chris Baker, Cyfarwyddwr Pêl-droed Met Caerdydd, “Mae sicrhau statws Categori A ac Academi Merched FAW yn gyflawniad gwych ac yn dyst i ymroddiad ac arbenigedd ein staff sy’n cefnogi datblygiad chwaraewyr ifanc flwyddyn ar ôl blwyddyn. Rydym yn edrych ymlaen at barhau i adeiladu rhaglen o ansawdd uchel ar gyfer rhai o bêl-droedwyr ifanc gorau Cymru, tra bod ein statws Academi Merched FAW newydd yn agor cyfleoedd cyffrous i dyfu gêm y merched yn lleol.

“Mae’r ddau statws yn golygu y gallwn ddarparu profiadau gwell, mynediad gwell, ac amgylchedd mwy proffesiynol sy’n helpu i gael gwared ar rwystrau a chefnogi chwaraewyr ar eu taith. Rydym yn falch o alinio’r cynnydd hwn ag uchelgais Prifysgol Fetropolitan Caerdydd i fod yn Brifysgol Chwaraeon Cymru, ac rydym yn edrych ymlaen at weithio’n agos gyda Chymdeithas Bêl-droed Cymru i godi safonau a chryfhau pêl-droed ddomestig ar draws llwybrau bechgyn a merched.”

Dywedodd Jack Lyons, Rheolwr yr Academi ym Met Caerdydd: “Diolch yn fawr iawn i Gymdeithas Bêl-droed Cymru, yn enwedig Drew Sherman a Brad Flay, am eu cefnogaeth barhaus, ac i Amethyst am helpu i godi safonau ar draws gêm Cymru. Gyda’n tîm Dan 12 oed wedi’u coroni’n Bencampwyr Cenedlaethol yn ddiweddar, rydym yn gyffrous i adeiladu ar y llwyddiant hwnnw a pharhau i wthio’r academi ymlaen — gan greu’r amgylchedd gorau posibl i chwaraewyr ifanc ddatblygu a ffynnu.”

Wrth i'r clwb droi ei sylw at dymor 2025-26, bydd dyddiadau treialon Academi Merched yr Archers yn cael eu cyhoeddi'n fuan.