Llywodraeth Cymru yn Cyhoeddi Rhaglen Genedlaethol ar gyfer Nofio a Diogelwch yn y Dŵr mewn Ysgolion

Mae disgwyl i blant ledled Cymru elwa o gyfleoedd cynyddol i ddysgu sgiliau hanfodol ar gyfer nofio a diogelwch yn y dŵr yn dilyn cyhoeddiad Llywodraeth Cymru am raglen genedlaethol newydd, Nofio Ysgol, a fydd yn cael ei chyflwyno o fis Medi 2026.

Bydd y fenter newydd yn rhoi mynediad i ddisgyblion ysgolion cynradd at wersi strwythuredig ar gyfer nofio a diogelwch yn y dŵr, gan helpu mwy o bobl ifanc i ddatblygu hyder yn y dŵr ac o'i gwmpas wrth ddysgu sgiliau achub bywyd. I ddechrau, bydd y rhaglen yn cael ei chyflwyno  mewn nifer o ardaloedd awdurdod lleol cyn ehangu ledled Cymru, gyda’r gobaith o gyflwyno'n llawn ar lefel genedlaethol erbyn blwyddyn academaidd 2028-29.

Yn ôl Llywodraeth Cymru, bydd disgyblion ym Mlynyddoedd 4 a 5 yn derbyn o leiaf 20 o wersi nofio a diogelwch yn y dŵr bob blwyddyn, gan gynnwys hyder yn y dŵr, technegau hunan-achub a chymhwysedd nofio sylfaenol. Bydd dysgu yn yr ystafell ddosbarth hefyd yn rhan o'r rhaglen, gan sicrhau bod plant yn cael gwell dealltwriaeth o ddiogelwch yn y dŵr ac ymwybyddiaeth o risg.

Mae lansio Nofio Ysgol yn fuddsoddiad sylweddol mewn gwella mynediad at gyfleoedd nofio i bobl ifanc. Bydd cyllid o £2 filiwn gan Lywodraeth Cymru yn helpu ysgolion i oresgyn rhwystrau i gyfranogiad, gan gynnwys costau trafnidiaeth, gofynion hygyrchedd a mynediad at gyfleusterau.

Mae'r cyhoeddiad yn dilyn tystiolaeth bod mynediad at nofio mewn ysgolion yn parhau i fod yn anghyson ledled Cymru. Adroddodd Nofio Cymru fod tua 66,000 o blant oedran cynradd wedi cymryd rhan mewn gwersi nofio mewn ysgolion yn ystod blwyddyn academaidd 2024-25, er gwaethaf y ffaith bod mwy na 182,000 o ddisgyblion yn gymwys i gymryd rhan.

Dywedodd Laura Williams, Cyfarwyddwr Cynorthwyol Gweithgaredd Corfforol ac Iechyd Chwaraeon:

“Rydym wrth ein bodd yn gweld y buddsoddiad sylweddol hwn mewn nofio mewn ysgolion a diogelwch dŵr ledled Cymru. Mae nofio yn sgil bywyd hanfodol sy'n cefnogi diogelwch, hyder a lles pobl ifanc, a dylai pob plentyn gael y cyfle i ddysgu.

Fel Prifysgol Chwaraeon Cymru, mae Met Caerdydd yn falch o chwarae rhan flaenllaw wrth godi ymwybyddiaeth o bwysigrwydd nofio mewn ysgolion trwy Bartneriaeth Nofio Ysgol Caerdydd, ac rydym yn falch o fod wedi cyfrannu at ddatblygiad y rhaglen genedlaethol hon. Edrychwn ymlaen at weld yr effaith gadarnhaol y bydd yn ei chael ar blant a phobl ifanc ledled Cymru.”

Mae Cymuned y Met, yn gwybod y rôl bwysig y mae nofio yn ei chwarae wrth ddatblygu hyder, gwydnwch ac arferion gweithgarwch corfforol gydol oes. Yr un mor bwysig, mae nofio yn sgil bywyd sylfaenol a all helpu i gadw plant yn ddiogel yn y dŵr ac o'i gwmpas. Bydd ehangu mynediad at addysg nofio a diogelwch dŵr o ansawdd uchel yn rhoi cyfle i fwy o bobl ifanc ddatblygu'r sgiliau hanfodol hyn, waeth beth fo'u cefndir neu ble maent yn byw.

Mae'r rhaglen hefyd yn cyd-fynd ag uchelgeisiau ehangach i wella lles corfforol plant, cefnogi ffyrdd o fyw iach ac egnïol, a lleihau anghydraddoldebau o ran mynediad at gyfleoedd chwaraeon. Disgwylir y bydd cefnogaeth ychwanegol ar gael i gymunedau a dysgwyr sy'n wynebu'r rhwystrau mwyaf i gyfranogiad, gan gynnwys ysgolion gwledig, darpariaeth cyfrwng Cymraeg a disgyblion ag anghenion dysgu ychwanegol.

Rydym yn croesawu'r buddsoddiad hwn ac yn edrych ymlaen at weld yr effaith gadarnhaol y bydd y rhaglen yn ei chael ar ddisgyblion, ysgolion a chymunedau ledled Cymru dros y blynyddoedd nesaf.

I weld y cyhoeddiad gwreiddiol gan Lywodraeth Cymru ewch i: Rhaglen nofio a diogelwch dŵr i ysgolion yn cael ei chyflwyno o fis Medi | GOV.WALES