Grant Cyfalaf yn agor i gefnogi clybiau chwaraeon ledled Caerdydd

Mae clybiau chwaraeon ledled Caerdydd yn cael eu gwahodd i wneud cais am Grant Cyfalaf Caerdydd 2026 , cyfle ariannu a gynlluniwyd i gefnogi datblygu a gwella cyfleusterau, offer a mannau sy'n helpu cymunedau lleol i gymryd rhan mewn chwaraeon a gweithgarwch corfforol.

Am ragor o wybodaeth, canllawiau cymhwysedd a manylion ymgeisio, cysylltwch â: metcommunity@cardiffmet.ac.uk

Wedi'i ariannu gan Gyngor Caerdydd a'i weinyddu gan Chwaraeon Met Caerdydd , bydd y Grant Cyfalaf yn cefnogi clybiau a sefydliadau chwaraeon cymunedol cymwys gyda phrosiectau cyfalaf a all wneud gwahaniaeth parhaol i'w haelodau, cyfranogwyr ac ardaloedd lleol.

Mae'r gronfa wedi'i hanelu at brosiectau sy'n gwella ansawdd, hygyrchedd a chynaliadwyedd darpariaeth chwaraeon cymunedol ledled y ddinas. Gallai hyn gynnwys uwchraddio ystafelloedd newid neu glwbdai, gwelliannau i hygyrchedd, datblygu caeau, goleuadau sy'n effeithlon o ran ynni, ardaloedd i wylwyr, cyfleusterau storio, eitemau mawr o offer, neu fuddsoddiadau cyfalaf eraill sy'n helpu clybiau i dyfu a gwasanaethu eu cymunedau'n well.

Rhoddir blaenoriaeth i brosiectau sy'n cyfrannu at un neu fwy o'r meysydd canlynol:

• Cynyddu cyfranogiad mewn ardaloedd difreintiedig

• Hyrwyddo amgylcheddau diogel a chynhwysol

• Gwella hygyrchedd i gyfleusterau

• Cynyddu cyfranogiad mewn chwaraeon a ffyrdd o fyw egnïol

• Budd i'r gymuned leol ehangach

Mae'r grant yn adlewyrchu ymrwymiad ehangach Chwaraeon Met Caerdydd i weithio gyda phartneriaid ledled y ddinas i gynyddu cyfranogiad, cryfhau chwaraeon cymunedol a chreu cyfleoedd mwy cynhwysol i bobl fod yn egnïol.

Rhaid i sefydliadau cymwys fod wedi'u lleoli yng Nghaerdydd a darparu ar gyfer pobl y ddinas. Dylai ymgeiswyr fod yn glybiau dielw cyfansoddedig, elusennau, grwpiau gwirfoddol, sefydliadau cymunedol neu fentrau cymdeithasol, gyda phrosiectau nad ydynt wedi cychwyn eto ac sy'n canolbwyntio ar fuddsoddiad cyfalaf.

Bydd panel yn asesu’r ceisiadau gyda’r clybiau/sefydliadau llwyddiannus yn gorfod rhoi’r wybodaeth ddiweddaraf am gynnydd a dangos effaith eu prosiect ar ôl ei gwblhau.

Dywedodd James Horwood, Cydlynydd Gweithgaredd Corfforol a Chynhwysiant yn Chwaraeon Met Caerdydd:

“Mae’r Grant Cyfalaf yn gyfle gwerthfawr i gefnogi’r clybiau a’r sefydliadau cymunedol sy’n chwarae rhan mor bwysig wrth helpu pobl ledled Caerdydd i gymryd rhan mewn chwaraeon a gweithgarwch corfforol. Rydym yn awyddus i glywed gan glybiau sydd â phrosiectau a all wella cyfleusterau, cynyddu hygyrchedd, creu amgylcheddau mwy cynhwysol a gadael budd parhaol i’w cymunedau lleol.”

Anogir clybiau chwaraeon sydd â diddordeb mewn gwneud cais i adolygu'r canllawiau llawn cyn cyflwyno cais.

Am ragor o wybodaeth, canllawiau cymhwysedd a manylion ymgeisio, cysylltwch â: metcommunity@cardiffmet.ac.uk