Myfyriwr Met Caerdydd Josef Dilks yn Cyfuno Criced, Technoleg a Dadansoddi Perfformiad

Mae myfyriwr Prifysgol Metropolitan Caerdydd, Josef Dilks, yn rhoi ei angerdd dros griced ar waith, gan gyfuno ei astudiaethau mewn Dadansoddi Perfformiad Chwaraeon â phrofiad yng Nghlwb Criced Sir Forgannwg a rôl flaenllaw wrth ddatblygu dadansoddi perfformiad yng Nghlwb Criced Met Caerdydd.

Ar hyn o bryd, mae Josef yn astudio Dadansoddi Perfformiad Chwaraeon Lefel 6 ym Met Caerdydd, ac mae wedi bod yn meithrin ei arbenigedd mewn dadansoddi fideo, meddalwedd arbenigol a defnyddio data i gefnogi perfformiad chwaraeon, wrth ennill profiad ymarferol gwerthfawr ar draws criced prifysgol a phroffesiynol.

Dechreuodd ei daith gyda Hoci Met Caerdydd, lle bu'n gweithio fel Dadansoddwr Cynorthwyol cyn symud ymlaen i'w swydd bresennol fel Pennaeth Dadansoddi ar gyfer Criced Met Caerdydd. Yn y rôl hon, mae Josef yn goruchwylio'r ddarpariaeth dadansoddi ar draws timau perfformiad y dynion a'r menywod, tra hefyd yn gweithio gyda myfyrwyr Lefel 5.

Gan weithio'n agos gyda Gethin Smart, Pennaeth Criced ym Met Caerdydd, mae Josef wedi helpu i gyflwyno Fulltrack AI i ddarpariaeth dadansoddi perfformiad y clwb, gan ddod â thechnoleg newydd i sesiynau hyfforddi a gemau dan do.

Mae cyflwyno'r dechnoleg wedi galluogi Criced Met Caerdydd i ddatblygu dull mwy cyson o ddadansoddi perfformiad ar draws ei garfannau, gan gefnogi hyfforddwyr a chwaraewyr trwy fynediad gwell at ddata fideo a pherfformiad.

"Fe wnaethon ni gymryd y cam cyntaf i ddewis Fulltrack AI fel offeryn i gefnogi ein darpariaeth dadansoddi perfformiad, ac ers hynny rydym wedi croesawu ei ddefnydd ar draws pob agwedd ar y clwb, o sesiynau hyfforddi i gemau dan do," eglurodd Josef.

Ochr yn ochr â'i waith ym Met Caerdydd, treuliodd Josef haf 2026 yn ennill profiad proffesiynol fel Intern Dadansoddi Perfformiad gyda Chlwb Criced Sir Forgannwg.

Yn ystod ei interniaeth, cefnogodd amrywiaeth o raglenni, gan gynnwys academïau'r bechgyn a'r merched, tîm y menywod a thîm y dynion. Roedd ei gyfrifoldebau'n cynnwys mynychu gemau, codio byw a chynhyrchu dadansoddiadau ar ôl gemau gan ddefnyddio PCS Pro, gan weithio ar draws gwahanol fformatau criced, o gemau T20 i gemau tridiau.

Rhoddodd y profiad gyfle iddo gymhwyso ei ddysgu prifysgol mewn amgylchedd chwaraeon proffesiynol, gan weithio ochr yn ochr â hyfforddwyr a chwaraewyr i ddarparu mewnwelediadau technegol a thactegol.

"Rhoddodd hyn brofiad gwerthfawr i mi o weithio mewn amgylchedd criced proffesiynol a'r cyfle i ddatblygu fy sgiliau dadansoddol wrth gefnogi hyfforddwyr a chwaraewyr gyda mewnwelediadau technegol a thactegol," meddai Josef.

I Josef, sydd wedi chwarae criced o oedran ifanc, mae'r cyfle i gyfuno ei astudiaethau academaidd â phrofiad ymarferol mewn camp y mae'n ei charu wedi bod yn arbennig o werth chweil.

"Ar ôl chwarae criced o oedran ifanc, mae wedi bod yn arbennig o werth chweil cyfuno fy angerdd dros y gamp â'm hastudiaethau ac ennill profiad mewn dadansoddi perfformiad ar lefel prifysgol a phroffesiynol."

Mae taith Josef yn tynnu sylw at y cyfleoedd sydd ar gael i fyfyrwyr Met Caerdydd ddatblygu eu sgiliau proffesiynol wrth gyfrannu at berfformiad chwaraeon. O gefnogi timau prifysgol i ennill profiad o fewn y gêm broffesiynol, mae ei waith yn dangos sut y gall dysgu academaidd a phrofiad ymarferol fynd law yn llaw.

Drwy ei rôl barhaus gyda Chriced Met Caerdydd, mae Josef yn parhau i ddatblygu ei arbenigedd wrth helpu i ddod â thechnoleg dadansoddi perfformiad i amgylchedd chwaraeon y brifysgol.