Connor yn paratoi i ymgymryd â her 126km yn y Rhath i gefnogi achosion sy’n agos at ei galon

Byddai rhedeg mwy na 126 cilometr dros 24 awr yn her enfawr i unrhyw athletwr. I Connor, bydd y rheswm dros wneud hynny yn aros amdano ar y llwybr ei hun.

Ddydd Gwener 25 Medi, bydd Connor yn dechrau her ddygnwch ryfeddol o amgylch Llyn y Rhath a Maes Hamdden y Rhath, gan redeg cylch 5.27km bob awr, ar yr awr, am 24 awr yn olynol.

Gan ddechrau am 11am ddydd Gwener a pharhau drwy’r nos nes i’r lap olaf orffen am 10am ddydd Sadwrn 26 Medi, bydd cwblhau pob cylch yn golygu ei fod wedi teithio tua 126km, sy’n gyfwerth â thri marathon.

Mae’r her yn cael ei threfnu drwy Conprove Club, cymuned redeg am ddim yng Nghaerdydd y mae Connor wedi’i datblygu dros y blynyddoedd diwethaf. Dechreuodd y clwb gyda grŵp bach yn dod at ei gilydd i redeg, ond mae wedi tyfu’n gymuned groesawgar sy’n cynnwys rhedwyr o wahanol oedrannau, cefndiroedd a galluoedd, o athletwyr profiadol i bobl sydd newydd ddechrau rhedeg.

Bydd pedwar rhedwr arall o Conprove Club yn ymuno â Connor ar gyfer yr her, gan gynnwys sawl aelod o gymuned Met Caerdydd. Bydd y myfyrwyr presennol Ella Ozikiz, sy’n astudio Chwaraeon, Addysg Gorfforol ac Iechyd, ac Emily Weale, sy’n astudio Chwaraeon ac Iechyd Ymarfer Corff, yn cymryd rhan ochr yn ochr â Gabriel Nico, a fydd yn dechrau astudio Gwyddorau Biofeddygol (Chwaraeon, Iechyd a Maeth) ym Met Caerdydd ym mis Medi, a William ‘Hicko’ Hickman, un o gyn-fyfyrwyr Cyfrifeg y Brifysgol.

Mae fformat yr her yn rhoi cyfarwyddyd cymharol syml i’r rhedwyr, ond gyda chanlyniad llym. Rhaid cwblhau pob lap 5.27km mewn pryd i ddychwelyd i’r man cychwyn ar gyfer dechrau’r awr nesaf. Gellir defnyddio unrhyw amser sydd ar ôl ar ôl cwblhau lap i fwyta, yfed, adfer neu, yn ystod y nos, geisio cael rhywfaint o gwsg.

Bydd unrhyw un sy’n methu dychwelyd mewn pryd ar gyfer dechrau’r lap nesaf yn cael ei gofnodi fel DNF, neu ‘Did Not Finish’.

Mae Connor wedi bod yn paratoi drwy hyfforddi am tua 11 i 13 awr yr wythnos, gan gyfuno pedair sesiwn cryfder â phum rhediad, ochr yn ochr â gweithio’n llawn amser. Er gwaethaf maint yr her sydd o’i flaen, nid yw erioed wedi cwblhau marathon o’r blaen, gyda’i rediad hiraf hyd yma yn 32km.

“Rwy’n gwybod y bydd yn anodd yn gorfforol, ond rwy’n credu mai’r her feddyliol fydd hyd yn oed yn anoddach,” meddai.

Fodd bynnag, mae pwrpas yr her yn mynd ymhell y tu hwnt i gwblhau’r pellter.

Bydd Connor a’r tîm yn codi arian ar gyfer Alzheimer’s Research UK a Chartref Cŵn Caerdydd, dau achos sydd â chysylltiadau personol iawn iddo.

“Mae dementia ar fy nain ar hyn o bryd, ac mae’r cartref gofal lle mae hi’n byw ar y llwybr y byddaf yn ei redeg dros y 24 awr, sy’n gwneud yr her yn un hynod bersonol,” eglurodd Connor. “Rwyf am ddefnyddio’r her i gefnogi pobl a theuluoedd y mae dementia yn effeithio arnynt.”

Mae Cartref Cŵn Caerdydd yr un mor agos at galon ei deulu. Tyfodd Connor i fyny o amgylch cŵn achub ac mae mwy na 15 o gŵn maeth wedi cael cartref dros dro gyda’i deulu dros y blynyddoedd, tra bod ei fam yn parhau i roi llawer iawn o’i hamser i helpu cŵn mewn angen.

Mae’r cysylltiadau personol hynny’n golygu bod yr her wedi’i chynllunio i fod am lawer mwy na phum rhedwr yn profi terfynau eu dygnwch.

Mae Connor eisiau i gymuned ehangach Caerdydd fod yn rhan o’r her, boed hynny drwy redeg un o’r lapiau bob awr gyda’r grŵp, gwneud cyfraniad, neu drwy alw heibio i’w gwersyll sylfaen yn y Gerddi Gwyllt ar ochr ogleddol Llyn y Rhath i gynnig ychydig o gefnogaeth.

“Byddwn wrth fy modd pe bai pobl yn cymryd rhan ar hyd y ffordd, boed hynny drwy gyfrannu, ymuno â mi am lap, neu alw heibio i ddweud helo, cael coffi a dangos rhywfaint o gefnogaeth,” meddai.

“Bydd pob cyfraniad, pob lap a phob gair o anogaeth yn golygu llawer iawn ac yn fy helpu i drwy’r 24 awr hynny.”

Bydd y lap gyntaf yn dechrau am 11am ddydd Gwener 25 Medi, gyda’r her yn parhau drwy’r dydd a’r nos cyn i’r lap olaf orffen am 10am ddydd Sadwrn 26 Medi.

Allech chi ymuno â’r tîm am lap, gwneud cyfraniad neu ddod i Lyn y Rhath i’w cefnogi wrth iddynt godi arian ar gyfer Alzheimer’s Research UK a Chartref Cŵn Caerdydd?